Iż-Żejtun kien ġa
jeżisti bħala parroċċa fl-1536. Fil-lista ta’ parroċċi ta’ l-Isqof Senatore
de Mello (ta’ l-1536), il-parroċċa taż-Żejtun iddedikata lil Sta Katarina
hija msemmija. Il-bini li jidher illum, magħruf bħala l-Knisja ta’ San
Girgor, huwa fil-fatt knisja iddedikata lil Sta Katarina.
Il-bini li jidher illum ma nbeniex kollu f’daqqa. Fil-fatt biċċa minnu nbena fil-15-il seklu filwaqt li partijiet oħra nbnew fis-16-il seklu. Illum din il-Knisja Medjevali hija magħrufa bħala l-Knisja ta’ San Girgor.
Fl-antik kienet issir
festa lil San Gregorju l-Kbir fit-12 ta’ Marzu ta’ kull sena. Hawnhekk
kienet tasal purċissjoni mill-inħawi ta’ Malta kollha.
Fil-knisja nsibu altar iddedikat lil San Girgor, filwaqt li quddiem
il-knisja nsibu wkoll l-istatwa ta’ l-istess qaddis, Gregorju Manju (Gregorju
l-Kbir:
ara ritratt lemin).
Għal tliet sekli sħaħ, din il-knisja serviet bħala parroċċa għall-inħawi kollha li nsibu fix-xlokk ta’ Malta. Il-knisja oriġinali mibnija fuq stil Sikulu-Normann ma għadhiex teżisti, imma jidher bini stil gotiku u romanesk. Il-koppla hija l-eqdem waħda li wieħed għadu jista’ jara f’Malta.
Il-ħbit mill-kursara ta’ l-1614 għadu mfakkar permezz ta’ iskrizzjoni fuq wieħed mill-pilastri tal-knisja. F’dan il-ħbit, il-knisja sofriet ħsarat kbar. Passaġġi sigrieta mibnija ġol-ħitan ħoxnin tal-knisja jagħtu iwassluk għal tieqa żgħira minn fejn wieħed jista’ jara sew kemm il-bajja ta’ Marsaxlokk kif ukoll dik ta’ Wied il-Għajn. Dawn iż-żewġ bajjiet kienu spiss jintużaw mill-furbana (pirati u sibbien) biex jinżlu fuq il-Gżejjer Maltin.
Il-Knisja ta’ San Girgor serviet bħala sptar għall-Maltin feruti fil-ġlied kontra l-Franċiżi bejn l-1798 u l-1800. Refuġjati mill-Kottonera stkennew fiha matul l-aħħar gwerra dinjija.
Illum fil-qrib insibu dar għall-anzjani kif ukoll qasam tad-djar. Il-Knisja ta’ San Girgor qiegħda terġa’ taqdi l-bżonnijiet pastorali tal-poplu Żejtuni.