18 t’Ottubru 1871: Ir-raħal ta’ Ħaż-Żebbuġ laqa’ fih it-twelid ta’ Karmenu (’il quddiem magħruf iktar bħala Dun Karm) fid-dar numru 18, Triq il-Parroċċa, minn Filippu (1828-1892) u Lunzjata mwielda Pisani (1831-1909). Karmenu kien id-disa’ wild fost għaxar aħwa, għalkemm minn dawn il-poeta laħaq biss erbgħa minħabba li l-oħrajn laħqu mietu.
  
 
1873:  Meta Karmenu kellu sentejn, il-familja tiegħu ġarret f’dar ikbar u isbaħ li kien bena missieru stess fl-istess triq (numru 40 (illum 36)).
1878:  Ta’ seba’ snin, grazzi għall-ftit edukazzjoni li huwa maħsub li kellu missieru, Karmenu beda jmur l-iskola primarja tal-Gvern għalkemm l-edukazzjoni obbligatorja kienet għad fadlilha biex tidħol f’pajjiżna.
  
 
21 ta’ Settembru 1885:  Karmenu daħal is-Seminarju Minuri għax fi skola tal-Knisja aktar seta’ jilħaq l-ambizzjonijiet tal-ġenituri tiegħu. Għal dak iż-żmien l-istat saċerdotali kien ifisser livell soċjali għoli.
 
1888:  Ta’ sbatax-il sena, Karmenu kompla l-istudji tiegħu fis-Seminarju Maġġuri fil-mixja tiegħu lejn is-saċerdozju. F’din l-istess sena kiteb l-ewwel poeżija bit-Taljan iddedikata lill-Isqof ta’ dak iż-żmien, Pietru Pace, li ġġib l-isem Del mio genio primizio. Wara kors ta’ sentejn filosofija, fl-1890 huwa beda l-kors tat-Teoloġija li wasslu għas-saċerdozju.
2 t’April 1892:  Miet missier Karmenu, Filippu, fl-għomor ta’ 64 sena. Hu kien ġej minn familja ta' bdiewa iżda x-xogħol primarju tiegħu kien dak ta’ baħħâr bejn Malta u l-Greċja u xi artijiet oħra. Biex ifakkar il-mewt ta’ l-għażiż missieru, hu kiteb sunett bit-Taljan li jġib l-isem A mio padre morto.
1893:  Karmenu, bħala seminarista, siefer għall-ewwel darba ma’ sħabu s-seminaristi biex jieħu sehem fiċ-ċelebrazzjonijiet tal-15-il anniversarju tal-pontifikat tal-Papa Ljun XIII f’Ruma.
17 ta’ Mejju 1894:  Ta’ 23 sena Dun Karm ġie ordnat saċerdot fil-Konkattidral ta’ San Ġwann. Wara ftit xhur beda jgħallem fis-Seminarju tal-Furjana u iktar tard f’dak ta’ l-Imdina wkoll. Hu kien jgħallem diversi suġġetti fosthom l-Ingliż, it-Taljan u l-Latin fis-Seminarju Minuri, u l-Istorja tal-Knisja u ta’ l-Arkeoloġija Nisranija lill-istudenti tat-teoloġija fis-Seminarju Maġġuri.
  
 
  1896:  Dun Karm ħareġ l-ewwel ġabra ta’ poeżiji bit-Taljan bl-isem ta’ Foglie d’Allore. Din tiġbor fiha 37 poeżija li kiteb hu stess bejn is-17 u l-24 sena tiegħu.
1901:  Dun Karm siefer għat-tieni darba, f’Pariġi u Londra b’waqfa ta’ 20 ġurnata f’Tuneż.  
 

1903:  Ħareġ il-ktejjeb Versi, stampat f’Palermo, li kien jiġbor fih xi poeżiji bit-Taljan.
 
Daħla
  1871-1903
 1909-1936
  1938-1956
   1957-1961
      Ritratti
Poeżiji
     Ħajr
  
Produzzjoni: Skola Sekondarja Dun Karm Psaila, Ħaż-Żebbuġ
Disinn: m7alpha Design Studios