QUDDIEM XBIHA TAL-MADONNA (1912)

Hekk kont sabiħa meta rajtek darba
F’ħolma, fil-hena taż-żgħurija tiegħi;
Kont rieqed waħdi f’sodda ċkejkna, mwarrba,
U Int mis-sema nżilt u qgħadt ftti miegħi.

Sbiħ il-jum, għejb ix-xemx, flimkien imxierka,
M’għandhomx lewn ħelu bħal wardiet ħaddejk;
Tisboq kull dija tas-smewwiet, o Mbierka,
Il-leħħa rżina minn ta’ ħbub għajnejk.

Warda li tbexxaq fiż-żernieq ta’ Mejju
Tixbaħ id-daħka ta’ xofftejk, ħanina,
Fil-ħin li miegħek tħaddan, tfajjel ħlejju,
Il-kbir Feddej, li bata u miet għalina.

Għajnejh miksura f’nagħsa ħiemda, iserraħ
Ġesù fuq sidrek ir-ras tiegħu żgħira,
Minn qalbu għal qalbek ġid is-sema jferraħ...
Ma’ dwarek l-anġli b’qima jħarsu b’għira.

Imbierka l-id illi pinġietek! Dija
Serqet lill-kwiekeb, ġmiel lill-ward tal-ġonna,
U bih libbsitek, o b’kull ħajr mimlija,
Sultana tas-smewwiet, ħelwa Madonna.

Hekk kont sabiħa, jien niftakar sewwa,
Meta fil-ħolma ta’ żgħuriti lmaħtek;
T’għajnejk, ta’ fommok kienet din il-ħlewwa;
U jien fi mħabbti bl-isem t’omm sejjaħtlek.

INNU EWKARISTIKU
(NADURAWK, JA ĦOBŻ TAS-SEMA) (1913)

Nadurawk, ja Ħobż tas-sema,
Frott l-imħabba l-iżjed bnin;
Għalik l-anġli dlonk titniehed,
Inti l-hena tal-bnedmin. 

Nadurawk, ja Ħobż tas-sema,
Frott l-imħabba l-iżjed bnin. 

Nadurawk, ja Ħobż tas-sema,
Frott l-imħabba l-iżjed bnin;
Inti l-ħlewwa tal-qawwija,
Inti s-saħħa tal-fqajrin. 

Nadurawk, ja Ħobż tas-sema,
Frott l-imħabba l-iżjed bnin.

Nadurawk, ja Ħobż tas-sema,
Frott l-imħabba l-iżjed bnin;

Inti l-qawma ta’ min raqad,
Inti l-għaxqa tal-ħajjin. 

Nadurawk, ja Ħobż tas-sema,
Frott l-imħabba l-iżjed bnin.

Nadurawk, ja Ħobż tas-sema,
Frott l-imħabba l-iżjed bnin;

Jalla d-dinja tagħraf tħobbok,
Fik il-qlub huma henjin.

Nadurawk, ja Ħobż tas-sema,
Frott l-imħabba l-iżjed bnin. 

Nadurawk, ja Ħobż tas-sema,
Frott l-imħabba l-iżjed bnin,

Insellmulek, Alla moħbi,
Inti biss taħkem is-snin.

Nadurawk, ja Ħobż tas-sema,
Frott l-imħabba l-iżjed bnin.

LILL-KANARIN TIEGĦI (1915)

X’kien li laqqgħana f’din id-dar hekk ħiemda
Inti forsi ma tafx, għasfur lelluxi;
U anqa taf il-għaliex, meta jien noħroġ
Għax-xogħ’l fil-għodu, il-bieb niġbed warajja
U bil-moftieħ insakkru, u l-beda mixi
U l-ebda nifs ma tisma’, qabel narġa’
Indawwar il-moftieħ u nidħol jiena.
Aħjar għalik ma tafx; hekk ebda sehem
F’għommti ma tieħu, u bejn il-jiem u l-iljieli
Tgħaddi bla niket xejn il-ħajja tiegħek.

Kif jibda jroxx id-dawl narak tistenbaħ,
Għasfur lewn il-lellux, u ċ-ċkejkna rasek
Toħroġ minn taħt il-ġwienaħ fejn tkebbibha
Awl il-lejl, meta x-xemx tinżel u int tiskot
U titħejja biex torqod; dlonk tmedd riġlek
Fuq il-qasba ħdejn l-ieħor u titfarfar,
Tinżel tnaqqar xi qanba u fis il-ħlewwa
Ta’ leħnek tibda ddoqq ġewwa widnejja
Li kulma tmur titqawwa. Iżżiġġ u taqbeż
Bejn għanja u oħra u mal-ħadid li jagħalqek
Taqbad bir-rqaq difrejk, u terħi u tarġa’
Għal fuq qasba bla ma tehda ; u l-ħeffa
Ta’ riġlejk u ġwenħajk, il-ħarsa, il-għanja
Juru li kulma fik hu hena u saħħa.
Bi ħlewwa li ma bħalha tħares lejja
Meta nersaq niex nagħalfek. Int tagħrafni,
Nifhmu wisq tajjeb; u għalhekk taħmilni,
Bla ma titnaffar xejn, niftaħ il-bieba
Tal-qafas tiegħek u l-kejliet inneħħi
Ta’ l-ikel u tax-xorb biex nimlihomlok ;
U b’għajta sħiħa, donnok trid tiżżini
Xi ħajr talli ħsibt fik, tarġa’ tilqagħni
Meta nagħlaq il-bieba u nerġa’ ndendlek
F’dik in-naħa tad-dar fejn bard ma jaħqrek
U ftit tax-xemx iżżurek. Għalxejn nersaq
Xi drabi ħiemed fuq subgħajn riġlejja
Biex naqbdek rieqed jew għażżien ; minn tlugħek,
Ja xemx, sa nżulek, l-ebda serħ u l-ebda
Għeja ma tagħmel bik. Xi ġmiel ta’ ħajja,
Tgħix bla ma taħseb x’ikun għada u liema
Għilt u ġlied qed isir barra minn darek!

Iżda ma ngħirx għalik, għasfur lelluxi,
Għalkemm ħajtek togħġobni. Iżjed fil-għoli
Mill-ħajja ta’ din l-art it-tama tiegħi.
Naf illi bosta drabi l-ħobż li niekol
Huwa mxarrab bid-dmugħ, u flok il-kelma,
Xi darba bla ma rrid, toħroġ tnehida,
Għaliex fejn żrajt il-ward kiber bil-kotra
Xewk u għolliq, u min bi mħabbtu safja
Sata’ jsabbarni, intemm qabli ġo qabar;
Imma naf illi d-dmugħ miżrugħ fid-dinja
Irodd ferħ fis-smewwiet, u wara dina
Il-ħolma li ngħidulha ħajja, tiġi
Il-qawma mill-imwiet fid-dawl ta’ dejjem.

Hekk ngħixu mela t-tnejn, għasfur lelluxi :
Int hieni bik innifsek u bi mħabbti;
Jien bit-tama li f’qalbi Alla nissilli.

IL-VJATKU (1915)

Kollox dlam ċappa, żiffa kiesħa tvenven
Ġox-xquq tat-twieqi u fuq il-ħġieġ imsakkar,
Ix-xita rqiqa, bla ma tehda, ittektek,

U mill-imwieżeb

L-ilma jċarċar fit-toroq. Fuq iż-żlieġa
Ta’ l-art imxarrba ’l hawn u ’l hinn tinkiser
Id-dija ħamra tal-fanali, u donnha

Għar-rqad tistiednek.

Fil-bogħod igergru.

Fil-ħin nisma’ kemm kemm leħen qanpiena;
― Drajtu biżżejjed dak il-leħen ― jersaq
U kulma jmur jitqawwa. F’daqqa waħda

Nilmaħ jitħarrku

Xi dwal, tnejn tnejn … Resqin … man-naħa l-waħda
U ma’ l-oħra tat-triq jitqassmu; iħeffu,
Quddiem, it-tfal fin-nofs tmewweġ tħammar

Bandiera ċkejkna.

Qegħdin joqorbu sew … beda jinstama’
Il-leħen tal-qassis u tan-nies l-oħra; jidhru
Id-dawl fit-twieqi, wara l-ħġieġ, u f’nofshom

Nies għarkobbtejhom.

Fl-aħħar taqbida.

Nistħajjel miegħu għaddejjin, moħbija
Għall-għajnejn tal-bnedmin, anġli bil-qtajja’
U Lilu jfaħħru li f’daqsxejn ħobż abjad

Il-kobor tiegħu

Għalaq u ħeba, u b’għira mqaddsa jżiġġu
Għall-hena ta’ min bih jixba’ u jitwettaq.
Għadda Ġesù … warajh baqgħet bħal fwieħa

Ħelwa tal-ġenna.

Oh tagħlim il-Feddej! Oh Emmna mqaddsa!
Kemm intom sbieħ! Kemm fikom għerf tas-sema!
Oh Tjieba ta’ bla tarf, int biss stajt tagħmel

Dal-ġenn ta’ mħabba!

 
Deh, meta l-jiem ta’ din il-ħajja għalija
Ikunu waslu biex jintemmu, u mdejjaq
Taħt il-ħakma tal-mewt, kollu nistħajlu

Ħolma l-imgħoddi,

Ikun bil-lejl, ikun bin-nhar, fix-xitwa
Jew fil-qilla tas-sajf, hekk, ja Mulejja,
Ejja żurni, bit-tfal tnejn tnejn, bil-leħen

Li jitlob ħniena.

L-aħħar Ħabib, ejja ġo sidri, u qiegħed
Qalbek fuq qalbi u minn kull dnub saffiha.
Miegħek mgħannaq, Ġesù, naqbad bla nibża’

It-triq ta’ dejjem.

1921 – LIL ĦUTI MALTIN
Nhar l-Għoti tal-Kostituzzjoni

Qum mill-ħedla li ’l qalbek mewtitlek,
Ġens ta’ ħila, ta’ għaqal, ta’ ġieħ;
Poplu Malti, ix-xemx telgħet, sejħitlek;
Aqbad triqtek lejn xefaq sabiħ.

Ma tħosshiex ġewwa sidrek il-mewġa
Ta’ demm ġdid li f’saħħitha ssaffik?
Ma tħosshiex tilgħab f’wiċċek il-fewġa
Tal-ħelsien li ħajja oħra tagħtik?

Dan hu l-jum u din is-siegħa;
Issir l-għaqda, isir il-patt;
’Kk ma taqbdux fil-ħarba tiegħu,
Dan iż-żmien ma jerġa’ qatt.

Kisser l-għodda ta’ l-għira ġellieda,
Iftaħ qalbek għall-kelma tas-sliem;
Għalenija, m’hemmx ifrem mir-rieda,
Iżda mqassma, tintilef fil-kliem.

Għandek mera fil-ljuni qalbiena
Illi tqabdu mal-Mislem magħdub;
Kienu ftit, u kien għadu bla ħniena,
Iżda rebħu bil-għaqda tal-qlub.

Dan hu l-jum u din is-siegħa...

LIL ĠANNINA PISANI – I / II (1936)

Hemm issa qiegħda taħt it-trab sewdieni
ta’ qabar kiesaħ u mudlam; mitfija
ħarstek is-sbejħa, xhieda ferreħija
ta’ qalb nadifa ġewwa sider hieni.

Għalxejn fuq rasek minn filgħodu kmieni
tgħanni l-bufula ġoċ-ċipress moħbija,
għalxejn ir-rużinjol b’nota mbikkija
jikser is-skiet tal-lejl għannej waħdieni.

Xejn iżjed ma jifdik min-nagħsa tqila,
la xemx, la siġar, la għanjiet ta’ ħlewwa,
anqas niket u dmugħ fis-sahra twila;

iżda fuq qabrek tiddi tama sbejħa;
int emmint u ħabbejt fil-ħaqq u s-sewwa
u għad ta’ Min ħabbejt tqajmek is-sejħa.

Ġannina, l-qabar mhux għal dejjem: sħiħa
qiegħda ġo sidri din it-tama kbira;
għad terġa’ tixgħel ħarstek is-sabiħa,
tarġa’ tal-hena tħeġ’ġek it-tferfira.

Il-ġebla li tgħattik għalxejn tkun xħiħa,
għax il-wegħda ta’ Kristu m’hix qasira:
“Jekk miegħi tħaddan is-salib, ħafifa
tkunlek il-qawma u ruħek ma tkunx fqira.”

Għad nerġgħu bħal ma konna ġewwa darna,
henjin f’Dar il-Missier li jħobb ’l uliedu,
mal-Ħbieb li fit-tiġrib kienu madwarna ;

u qatt iżjed ma tgħib tal-ħajja d-dija
fejn ġid u ferħ la jonqsu u la jiżdiedu,
Ħajja bħal baħar kbir dejjem mimlija.

LILL-KANARIN (1938)

Għasfur lelluxi, merħba bik. Fis-sikta
tad-dar fejn waħdi qiegħed ngħaddi żmieni,
int tkun il-wens għal din il-qalb imnikkta
fil-hemm illi, jaħasra! wasal kmieni.

Fil-għanja tiegħek safja, imżewqa, sħiħa,
li tidwi mal-ħitan tal-kamra tiegħi,
nistħajjel nisma’ n-nifs ta’ ruħ sabiħa
li ttir madwari u titkellem miegħi.

Għax int ma tafx, ħlejqa ferrieħa, liema
tjieba wasslitek f’din id-dar kennija,
anqas taf ix-xewqat ta’ ġid u sliema
li ġibtli miegħek. Jiena naf: għalija

int messaġġier ta’ ħsieb li jifhem sewwa,
ta’ qalb imwieżna fit-taħbita tagħha,
li qatt ma tibki barra u tidħak ġewwa,
u lil għajrha tixtieq l-hena tas-saħħa.

LILL-MADONNA TAL-KARMNU (1954)

F’egħluq il-mitt sena
li ilek fi ħdanna,
fil-fidi twettaqna,
fil-hemm tieqaf magħna,

Madonna tal-Karmnu,
għajn safja ta’ mħabba,
li dejjem ma’ dwarek
il-ġilju jitrabba,

Nixtiequ minn qalbna,
li tibqa’ thennina;
li Inti għal dejjem
tkun tagħna ir-reġina.